Chioma Anozie 
Otu mgbe ka Mgbada rioro Ezi na Mbe oru na ulo ya . Ka Mbe ruru, Mbe wee gaa gwa Ezi otu ha ga-esi ga ya na ego ole ha ga-ana ya ma ha ruchaa oru ahu. Ha wee kwekorita, zie Mgbada ubochi ha ga-abia. Ka chi ubochi ahu boro, ha jee be Mbgbada ma o noghi ya . Nwuye ya kporo ha gaa ebe ha ga-aru oru, Mbe lee oru ahu anya, Kwe n’isi si na ichiputa ede abughi okuko ya. Ha bido oru, ha rukata oru, o puo si ka ya gaa n’ogwe ma o bu iga zuo ike na okpuru osisi. O puta. Ezi jua ya ihe o na-eme o si na ya achoghi iji oso bakwu ya bu oro na iwu bu ma onye ije ga eru ebe onye oso ruru.
Ezi amatala ihe Mbe na-agho, o wee si ya ka ya onwe ya gaa n’ogwe na ya ekoteweghi okwu nke ya na-egbu nwa onye -ocha. Mbe ekwere, si ya ya gaa ngwa ngwa ka o puta . Ezi kwe, gaa n’ime ohia izu ike. K a Mbe huru ka Mgbada na nwunye ya kwu okwu abia na-etii akuko di na nwunye, o malite oru ‘ike n’ike. Mgbada juo ya ebe Ezi no, o juo ya ma ob u na o matabeghi na Ezi bu onye ume ngwu na ike olu adighi ya ma otu.
O gwa ya na obu ya ruru oru ndi ruru aru. Ha wee iwe, kee nri ha wetara ha uzo ato, nye Mbe abuo. Mbe richaa oke nke ya n’iru ha, mechaa onu nara oke mmaya nke ya nua. Mgbada na nwunye ya wee lawa.
O rue mgbe Ezi putara, Mbe ebute nri si ya, “Lee nwa ntit nri Mgbada buteere dimkpa abuo ke ha wee mee ututu” Ezi elee nri anya, iwe juputa ya obi, Mgbe o choro itukwo, Mbe adua ya odu si ka ha jide nke ruru ha aka karia igbara cha akaa, Ezi kwe, ha rie nri.
Ezi nwere ike nwata, ike adighikwa ya ka na mmalite. Mbe wee tuara ya ilu si na o bu anwu waa ka e ji ama ndi ike di; ya lee na ugbu a ka ya ji eke ike. O na, o na-agu egwu na-egbu mkporohihio, ka chi daara, ha laa.
Ha rue n’ulo Mgbada, Mbe si ya “ Anyi ruchara oru niile, baa chita ego iri asaa chinye m’ n’aka” o juo Ezi o bukwa ihe ha kwuru, o si ya “E, o bu ya. Mgbada gwa oriaku ya ka o choo ego nye ha. O wee wetw ego Mbe anara. Ka ha na-ala, Mbe ana-eche ihe ya na Ezi ga-eme banyere ego a. O juo Ezi si, “ I ghotara na o bughi na oke ibu ka e ji ama dike ?” Ezi si ya , “O bu gini wetara ajuju nke a ? o si ya, “o dighi, kama anyi ga-eke ego anyi ugbu a. Aga m ewere ego ato nke onye e nyere ego n’aka, werekwa ego abuo nke onye butere ego: nke gafoduru, anyi ekewaa abuo” Ezi lee anya duu hu na ya ju, o rie ha rie niile, o wee kwere. Mbe were ego ise nye Ezi o nara ya. Ezi hu na Mbe anaghi agasi ije ike, si na ya ga-agha ya laa. Mbe si ya na o do otu ihe o ga-emere ya ga-eme ka ya mata na o bu enyi ya na eziokwu. Ezi si ya kwue ihe o bu. Mbe si ya na ya choro ka o duga ya Eke-amainyi izutara nwanyi ya akwa. Ezi si ya, “Nke a akarighi ihe mmadu na-emere ibe ya .
Mgbe ha rur ahia, Mbe rubie akwa ego iri na ise. Orio Ezi ka o nye ya ego nke ya ka ya wee kwuzuo ugwo, e mechaa, ya bia na be ya ka ya nye kwa ya. Ezi were ego nye ya. Mbe kwuo ugwo akwa , gwa Ezi ebe o nwere nsogbu n’ulo, ka o laa echi ka ha hu. Ezi kwe ya , wee gbalaa. Mbe ruo ulo chinye nwunye ya akwa ohuu ahu, iru wee buru ya so ochi. O makuo ya tie ya obi lee ya anya n’iru, si “DI M DI OMA”. Uka ha daba nda were werere nda werere.
Chi aboo, Ezi enweghi oghere ije ugwo be Mbe. o wee rapu si na echi adighi agwu agwu. N’ubochi so ya, Ezi wee gaa. Mbe si ya “O bu taa ka anyi kwuru ? Ezi si ya na ya enweghi oghere ubochi ha kara. Mbe si ya laa, echi ka o bia, Ezi wee laa. O ruo echi ya, Ezi wee gaa ma Mbe anoghi ya.
O wute Ezi nke uku, o gwa nwunye Mbe ka o kaara di ya na ya ga-abia echi ka o dotere ya ehgo ya. Ma o buru na o meghi otu a, na o ga aputara ha abuo uka. Mbe lota, nwunye ya gwa ya ihe Ezi kwuru na otu iru di ya. Mbe kwe n’isi si na echi ahu ka o ga-ama na Mbe bu dimkpa, na ejighi ya emecha aka. O kpoo oriaku ya, o za ya; o si ya ‘Nuzo utut echi, bupute nkume e ji esuru m ogwu. Bata aja uro, gwoo ya na mmiri tee m n’aru ka m buru aka nkume e ji esuru m ogwu. Ezi bia choo m, si ya na m dara oria i na-esuru m ogwu.” Oriaku kwe ya wee mee ihe a gwara ya ka chi booro.
Ezi bara mba bata be Mbe juo maka Mbe. Nwunye Mbe si ya na ahu esighi ya ike na ya na-esuru ya ogwu, Ezi baa, baa si’ “Kwusi isu ya bu ogwu osiso”. O kachie nti na-esu, Ezi bara n’ike buru ya bu Nkume o ji esu ogwu tufuo n’azu ulo.
Ma o maghi na o bu Mbe ka o tufuru. Mbe bilie, tichasia aja, tuturu mkpo, suru ude bata, hu Ezi ka o na aba mba na ew iwe. O jua Ezi, “O bu maka ego nwa ka i jiri kwusi Oriaku m isurum ogwu ?” Ezi na-aba mba si na ego ya ka ya choro ugbu a. Mbe si ya, “O di mma, i gaa weta aka nkume ahu i mafuru nye nwanyi m ka m chooro gi ego gi. Ezi mapu, gaa choo nkume a, choo n’elu , choo n’ala o hughi ya, O, bata Mbe si ya, M nye gi ego ka i laa rie, ma m nwuo n’oria? Nye m nkume m ma were ego gi. “ Iwe were Ezi nke uku; o puta kpokoo ndi ikpe. Ka ha kochara ihe na-esere ha, ndi ikpe wee si na o dighi ihe di omimi di ya, na oge o bula Ezi chotara nkume a nye Mbe, Mbe werekwa ego ezi nye ya. Ndi ikpe gbasaa.Ezi pua na-acho, na-adughari ala ebe niile imata ma o ga-ahu nkume a. Nke a bu otu Mbe siri rie ego oru ya na Ezi; mekwaa ihe Ezi ji adu ala na-acho nkume ahu ruo taa.